چین نے 2030 تک 6G ٹیکنالوجی کی کمرشل لانچنگ کی تیاری شروع کر دی

بیجنگ، 28 اگست: چین نے 6G سپر ہائی اسپیڈ موبائل کمیونیکیشن ٹیکنالوجی کی تحقیق و ترقی تیز کرنے، ٹیکنالوجی ٹرائلز اور عالمی معیار سازی کے عمل کو آگے بڑھانے اور 2030 تک 6G کی کمرشل تعیناتی کے لیے تیاری مکمل کرنے کا اعلان کیا ہے۔

چینی وزارت صنعت و انفارمیشن ٹیکنالوجی (MIIT) کے شعبہ اطلاعات و مواصلات کے ڈائریکٹر لیو یولِن نے 26 اگست کو ریاستی کونسل کے انفارمیشن آفس کی پریس بریفنگ میں بتایا کہ 2026 سے 2030 تک جاری رہنے والے 15ویں پانچ سالہ منصوبے کے دوران 6G کی بنیادی ٹیکنالوجیز پر تحقیق تیز کی جائے گی۔ انہوں نے کہا کہ مسلسل 6G ٹیکنالوجی ٹرائلز، معیارات کی تیاری اور صنعتی ماحولیاتی نظام کی تشکیل کے ذریعے ٹیکنالوجی کو پختہ کیا جائے گا تاکہ کمرشل تعیناتی کے لیے بنیاد تیار ہو سکے۔

چین نے جون 2026 میں 6G کی اختراعی ترقی کے لیے مرکزی و صوبائی سطح پر مشترکہ آزمائشی پروگرام بھی شروع کیا، جس کا مقصد 2029 تک مقامی طور پر تیار کردہ 6G ٹیکنالوجی حل، نئی ایپلی کیشنز اور 6G سے متعلق نئے ٹرمینل مصنوعات تیار کرنا ہے تاکہ کمرشل استعمال کے لیے ضروری صنعتی بنیاد مضبوط کی جا سکے۔

چینی حکام کے مطابق 6G کی ترقی تین مراحل میں آگے بڑھ رہی ہے، جن میں بنیادی ٹیکنالوجی کے تجربات، تکنیکی حل کے تجربات اور سسٹم نیٹ ورکنگ ٹرائلز شامل ہیں۔ سرکاری معلومات کے مطابق پہلا مرحلہ مکمل ہو چکا ہے جبکہ دوسرا مرحلہ شروع ہو چکا ہے اور 6G کے تقریباً 2030 کے آس پاس کمرشل استعمال میں آنے کی توقع ہے۔

جدید اور تیز ترین 6 جی کے ساتھ چین مستقبل کی دیگر اہم ٹیکنالوجیز، جن میں کوانٹم کمپیوٹنگ، بائیو مینوفیکچرنگ، ہائیڈروجن اور فیوژن توانائی، برین کمپیوٹر انٹرفیس اور ایمبوڈیڈ مصنوعی ذہانت شامل ہیں، کو بھی ترقی کے اہم شعبوں کے طور پر آگے بڑھا رہا ہے۔ چینی حکام کے مطابق مصنوعی ذہانت پہلے ہی ملک کے تحقیق و ترقی، ڈیزائن، پیداوار، مینوفیکچرنگ، معیار جانچ اور آپریشنز سمیت متعدد شعبوں میں تیزی سے ضم ہو رہی ہے۔

چین اس وقت 5G کے بعد اگلی نسل کے مواصلاتی نظام کی عالمی دوڑ میں اپنی پوزیشن مضبوط کرنے کی کوشش کر رہا ہے۔ ملک میں جون 2026 کے اختتام تک 5G بیس اسٹیشنز کی تعداد 51 لاکھ سے تجاوز کر چکی تھی، جبکہ 5G-A نیٹ ورکس کی کمرشل توسیع بھی جاری ہے، جو مستقبل میں 6G کے لیے ضروری انفراسٹرکچر اور صنعتی تجربے کی بنیاد فراہم کر سکتی ہے۔