بیلاروس کے اعلیٰ فوجی وفد کی سربراہ پاک بحریہ سے ملاقات، دفاعی تعاون مزید مضبوط بنانے پر اتفاق

اسلام آباد: جمہوریہ بیلاروس کے چیف آف جنرل اسٹاف اور فرسٹ ڈپٹی وزیر دفاع، میجر جنرل پاویل موراویکو کی قیادت میں ایک اعلیٰ سطحی وفد نے نیول ہیڈکوارٹرز اسلام آباد میں چیف آف دی نیول اسٹاف ایڈمرل نوید اشرف سے ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران باہمی دلچسپی کے پیشہ ورانہ امور، دفاعی تعاون اور دوطرفہ تعلقات کے فروغ پر تفصیلی تبادلہ خیال کیا گیا۔

چیف آف دی نیول اسٹاف ایڈمرل نوید اشرف نے کہا کہ پاکستان بیلاروس کے ساتھ اپنے تعلقات کو بہت اہمیت دیتا ہے اور دونوں ممالک کے درمیان طویل المدتی اور کثیرالجہتی تعاون کو مزید فروغ دینے کا خواہاں ہے۔

بیلاروسی وفد کے سربراہ نے علاقائی بحری سلامتی کے فروغ کے لیے پاک بحریہ کی پیشہ ورانہ صلاحیتوں، کوششوں اور عزم کو سراہا۔ ملاقات میں دونوں فریقوں نے موجودہ دوطرفہ دفاعی تعلقات کو مزید مضبوط بنانے اور دفاعی تعاون کے دائرہ کار کو وسعت دینے پر اتفاق کیا۔