مظفرآباد: آزاد جموں و کشمیر کونسل کی چار خالی نشستوں پر پاکستان مسلم لیگ (ن) کے تین اور پاکستان پیپلز پارٹی کے ایک امیدوار بلا مقابلہ منتخب ہوگئے۔

آزاد جموں و کشمیر الیکشن کمیشن نے 2 اکتوبر 2026 کو جاری کیے گئے باضابطہ نوٹیفکیشن کے ذریعے راجہ مشتاق احمد منہاس، چوہدری محمد سعید، چوہدری منظور احمد اور چوہدری لطیف اکبر کو آزاد جموں و کشمیر کونسل کا رکن منتخب قرار دے دیا۔

الیکشن کمیشن کے نوٹیفکیشن نمبر EC/S/25723-29/2026 کے مطابق چاروں امیدواروں کے انتخاب کا اعلان ریٹرننگ افسر کی جانب سے موصول ہونے والے انتخابی ریٹرن کی بنیاد پر آزاد جموں و کشمیر کونسل (الیکشن) ایکٹ 1976 کی دفعہ 18 کے تحت کیا گیا۔

منتخب ہونے والوں میں مسلم لیگ (ن) کے راجہ مشتاق احمد منہاس، چوہدری محمد سعید اور چوہدری منظور احمد جبکہ پاکستان پیپلز پارٹی کے چوہدری لطیف اکبر شامل ہیں۔

چار نشستوں کے مقابلے میں صرف چار امیدواروں کے کاغذات نامزدگی جمع ہونے کے باعث انتخابی عمل پولنگ کے بغیر مکمل ہوا اور الیکشن کمیشن نے چاروں امیدواروں کو باضابطہ طور پر منتخب قرار دے دیا۔

راجہ مشتاق احمد منہاس مسلم لیگ (ن) آزاد کشمیر کے سینئر رہنما ہیں۔ وہ صحافت سے وابستہ رہنے کے بعد عملی سیاست میں آئے اور آزاد جموں و کشمیر قانون ساز اسمبلی کے رکن منتخب ہونے کے علاوہ وزیر اطلاعات، سیاحت و ثقافت کی ذمہ داریاں بھی انجام دے چکے ہیں۔

چوہدری محمد سعید کا تعلق میرپور سے ہے اور وہ مسلم لیگ (ن) کے سینئر رہنماؤں میں شمار ہوتے ہیں۔ وہ آزاد کشمیر قانون ساز اسمبلی کے رکن اور وزیر بھی رہ چکے ہیں۔ 2016 کے انتخابات میں انہوں نے میرپور سے تحریک انصاف کے اس وقت کے علاقائی صدر بیرسٹر سلطان محمود چوہدری کو شکست دی تھی۔

چوہدری منظور احمد مسلم لیگ (ن) کے سینئر رہنما ہیں اور ان کا سیاسی تعلق مظفرآباد شہر سے ہے۔ مسلم لیگ (ن) نے انہیں کشمیر کونسل کی نشست کے لیے امیدوار نامزد کیا تھا۔

چوہدری لطیف اکبر پاکستان پیپلز پارٹی آزاد کشمیر کے سینئر رہنما ہیں۔ وہ آزاد جموں و کشمیر قانون ساز اسمبلی کے سابق اسپیکر، سابق قائد حزب اختلاف اور پیپلز پارٹی آزاد کشمیر کے صدر بھی رہ چکے ہیں۔ جون 2023 میں وہ آزاد کشمیر قانون ساز اسمبلی کے اسپیکر منتخب ہوئے تھے۔

الیکشن کمیشن کے باضابطہ نوٹیفکیشن کے مطابق کشمیر کونسل کی چار نشستوں پر مسلم لیگ (ن) کے تین اور پیپلز پارٹی کے ایک امیدوار منتخب ہوئے ہیں۔ نوٹیفکیشن پر الیکشن کمیشن آزاد جموں و کشمیر کے سیکریٹری ایاز بشیر کے دستخط موجود ہیں۔