یورپی یونین نے گولڈن پاسپورٹ اسکیموں پر شکنجہ کس دیا، پانچ کیریبین ممالک نشانے پر

اسلام آباد (خصوصی رپورٹ) یورپی یونین نے سرمایہ کاری کے بدلے شہریت دینے والی “گولڈن پاسپورٹ” اسکیموں کے خلاف سخت مؤقف اختیار کرتے ہوئے پانچ کیریبین ممالک کو خبردار کیا ہے کہ اگر انہوں نے اپنے شہریت بہ سرمایہ کاری (Citizenship by Investment) پروگراموں میں بنیادی اصلاحات نہ کیں یا انہیں ختم نہ کیا تو ان کے شہریوں کے لیے شینگن ممالک میں ویزا فری سفر کی سہولت معطل کی جا سکتی ہے۔

رپورٹس کے مطابق یورپی یونین کو خدشہ ہے کہ گولڈن پاسپورٹ اسکیموں کے ذریعے ایسے افراد بھی یورپی ممالک تک آسان رسائی حاصل کر سکتے ہیں جو منی لانڈرنگ، ٹیکس چوری، بدعنوانی یا دیگر غیر قانونی سرگرمیوں میں ملوث ہوں، جس سے یورپی سلامتی کو خطرات لاحق ہو سکتے ہیں۔

یورپی یونین کی وارننگ کا سامنا کرنے والے ممالک میں انٹیگوا اینڈ باربوڈا، ڈومینیکا، گریناڈا، سینٹ کٹس اینڈ نیوس اور سینٹ لوشیا شامل ہیں۔ ان ممالک میں غیر ملکی سرمایہ کار مقررہ سرمایہ کاری کے بدلے شہریت حاصل کرتے ہیں، جس سے انہیں یورپی ممالک سمیت متعدد ریاستوں میں ویزا فری سفر کی سہولت ملتی ہے۔

رپورٹ کے مطابق یورپی یونین نے ان ممالک کو اپنی اسکیموں پر نظرثانی اور ضروری اصلاحات کے لیے دو سال کی مہلت دی ہے۔ بصورت دیگر یورپی کمیشن ان ممالک کے شہریوں کے لیے ویزا فری سفر کی سہولت معطل کرنے کی سفارش کر سکتا ہے۔

ماہرین کے مطابق یورپی یونین کے اس اقدام سے کیریبین ممالک کی معیشت متاثر ہونے کا امکان ہے، کیونکہ ان کی شہریت بہ سرمایہ کاری اسکیمیں غیر ملکی سرمایہ کاری حاصل کرنے کا ایک اہم ذریعہ سمجھی جاتی ہیں۔ دوسری جانب، سرمایہ کاروں میں بھی ان پروگراموں کے مستقبل کے حوالے سے غیر یقینی صورتحال پیدا ہو گئی ہے۔

یاد رہے کہ گزشتہ چند برسوں کے دوران یورپی یونین متعدد بار گولڈن پاسپورٹ اور گولڈن ویزا اسکیموں پر تحفظات کا اظہار کر چکی ہے اور انہیں سلامتی اور شفافیت کے لیے ممکنہ خطرہ قرار دیتی رہی ہے۔