امریکہ اور پاکستان کا انسداد دہشت گردی تعاون مزید مضبوط بنانے کے عزم کا اعادہ

واشنگٹن، 5 اگست: پاکستان اور امریکہ نے انسداد دہشت گردی کے شعبے میں دوطرفہ تعاون مزید مضبوط بنانے کے عزم کا اعادہ کرتے ہوئے دہشت گردی کے خلاف مشترکہ کوششوں کو وسعت دینے، سرحدی سلامتی بہتر بنانے اور دہشت گرد تنظیموں کے سہولت کار نیٹ ورکس کے خاتمے کے لیے قریبی تعاون جاری رکھنے پر اتفاق کیا ہے۔

یہ اتفاق رائے واشنگٹن ڈی سی میں پاکستان۔امریکہ انسداد دہشت گردی مذاکرات کے چوتھے دور کے دوران سامنے آیا، جس کی مشترکہ صدارت امریکہ کے کوآرڈینیٹر برائے انسداد دہشت گردی سفیر گریگوری لوگیرفو اور پاکستان کی وزارت خارجہ کے اسپیشل سیکرٹری سفیر نبیل منیر نے کی۔

دونوں وفود نے انسداد دہشت گردی کے شعبے میں دوطرفہ شراکت داری کی اہمیت پر زور دیتے ہوئے موجودہ خطرات کا جائزہ لیا، باہمی تعاون بڑھانے کے امکانات پر تبادلہ خیال کیا اور سرحدی سلامتی کو مزید مؤثر بنانے کے ساتھ دہشت گردوں کے سہولت کار نیٹ ورکس کو توڑنے کے لیے عملی اقدامات پر گفتگو کی۔

مشترکہ اعلامیے میں کہا گیا کہ پاکستان اور امریکہ نے ان دہشت گرد تنظیموں کے خلاف مشترکہ عزم کا اعادہ کیا جو دونوں ممالک کے شہریوں اور خطے کے امن و استحکام کے لیے خطرہ ہیں، جن میں داعش خراسان (ISIS-K)، القاعدہ (AQ)، تحریک طالبان پاکستان (TTP)، بلوچستان لبریشن آرمی (BLA) اور اس سے وابستہ گروہ شامل ہیں۔

اعلامیے کے مطابق دونوں حکومتوں نے اس بات کا اعادہ کیا کہ اپنے شہریوں کے تحفظ اور خطے میں دیرپا امن، خوشحالی اور استحکام کے فروغ کے لیے انسداد دہشت گردی کے شعبے میں باہمی تعاون کو مزید مستحکم اور مؤثر بنایا جائے گا۔