اسٹیٹ بینک نے ہوگو بینک کو پائلٹ آپریشنز کی منظوری دے دی

کراچی: اسٹیٹ بینک آف پاکستان (ایس بی پی) نے ڈیجیٹل ریٹیل بینک ہوگو بینک کو پائلٹ آپریشنز شروع کرنے کی منظوری دے دی ہے۔

بزنس ریکارڈر کے مطابق اسٹیٹ بینک کی جانب سے منظوری کے بعد ہوگو بینک محدود پیمانے پر اپنی بینکنگ مصنوعات، ٹیکنالوجی پلیٹ فارم اور آپریشنل نظام کی عملی جانچ شروع کرسکے گا۔

پائلٹ آپریشنز کا مقصد بینک کی خدمات کو مکمل طور پر عوام کے لیے متعارف کرانے سے قبل اس کے سسٹمز، سیکیورٹی انتظامات، صارفین کے تجربے اور ریگولیٹری تقاضوں کا جائزہ لینا ہے۔

ہوگو بینک کو اسٹیٹ بینک نے 2023 میں ڈیجیٹل ریٹیل بینک کے طور پر اصولی منظوری دی تھی۔ یہ پیش رفت پاکستان میں ڈیجیٹل بینکاری کے شعبے کو وسعت دینے کے لیے اسٹیٹ بینک کے اقدامات کا حصہ ہے۔

بینک انتظامیہ کے مطابق پائلٹ مرحلے کے دوران صارفین کے تجربات اور فیڈ بیک کی بنیاد پر مصنوعات اور خدمات کو مزید بہتر بنایا جائے گا، جس کے بعد بینک کے مکمل کمرشل آپریشنز کی جانب پیش رفت کی جائے گی۔

ہوگو بینک کا مقصد جدید ٹیکنالوجی کے ذریعے صارفین کو آسان، تیز اور محفوظ ڈیجیٹل بینکاری خدمات فراہم کرنا اور ملک میں مالیاتی خدمات تک رسائی کو مزید بڑھانا ہے۔