ملتان: امیر جماعت اسلامی حافظ نعیم الرحمن نے پٹرولیم مصنوعات پر عائد لیوی اور مہنگائی کے خلاف کراچی سے شروع کیے گئے جماعت اسلامی کے لانگ مارچ کو ملتان میں چند روز کے لیے روکنے کا اعلان کردیا ہے۔

ملتان میں پریس کانفرنس کرتے ہوئے حافظ نعیم الرحمن نے کہا کہ وزیراعظم شہباز شریف کی جانب سے رابطے اور ملاقات کی پیشکش کے بعد جماعت اسلامی نے خیرسگالی کے طور پر لانگ مارچ کو فی الحال ملتان میں روکنے کا فیصلہ کیا ہے۔

حافظ نعیم الرحمن کے مطابق جماعت اسلامی اپنے احتجاج اور مطالبات سے دستبردار نہیں ہوئی۔ جماعت اسلامی کے دھرنے اور احتجاجی کیمپ جاری رہیں گے جبکہ وزیراعظم کی وطن واپسی اور ان سے ملاقات کے بعد آئندہ کے لائحہ عمل کا فیصلہ کیا جائے گا۔

امیر جماعت اسلامی نے واضح کیا کہ پٹرولیم لیوی کے خاتمے اور عوام کو ریلیف دینے کے مطالبے پر جماعت اسلامی اپنی جدوجہد جاری رکھے گی۔ ان کے مطابق لانگ مارچ کو ملتان میں روکنے کا فیصلہ وزیراعظم کے پہلے رابطے پر خیرسگالی کے طور پر کیا گیا ہے۔

وزیراعظم شہباز شریف نے نیویارک سے حافظ نعیم الرحمن سے ٹیلی فون پر رابطہ کیا اور اسلام آباد کی جانب لانگ مارچ کو اپنی پاکستان واپسی تک مؤخر کرنے کی درخواست کی تھی۔ وزیراعظم نے پٹرولیم لیوی کے معاملے پر جماعت اسلامی سے مذاکرات کی بھی پیشکش کی۔

جماعت اسلامی کا لانگ مارچ کراچی سے شروع ہوا تھا اور 22 ستمبر کو ملتان پہنچا، جہاں حافظ نعیم الرحمن نے مارچ کے اگلے مرحلے کو عارضی طور پر روکنے کا اعلان کیا۔