روس کے معاشی اہداف پر حملہ کرکے یوکرین نے پنڈورا باکس کھول دیا، صدر پیوٹن

ماسکو: روسی صدر ولادیمیر پیوٹن نے کہا ہے کہ یوکرین نے روس کے معاشی اہداف کو نشانہ بنا کر ’’پنڈورا باکس‘‘ کھول دیا ہے، جس کے بعد روس یوکرین کے اہم اور حساس معاشی شعبوں کو نشانہ بنا سکتا ہے۔

دی ماسکو ٹائمز کے مطابق پیوٹن نے ایک انٹرویو میں کہا کہ یوکرین کی جانب سے روسی معیشت کو نقصان پہنچانے کی کوشش کے نتیجے میں ایسی صورتحال پیدا ہوئی ہے جس کے اثرات خود یوکرین کو برداشت کرنا پڑ سکتے ہیں۔

روسی صدر نے کہا کہ ماسکو اب یوکرین کے ان معاشی شعبوں کو نشانہ بنانے کا حق رکھتا ہے جو ملک کے لیے انتہائی اہمیت رکھتے ہیں۔

روس کا دعویٰ ہے کہ یوکرین نے حالیہ عرصے میں ڈرون حملوں کے ذریعے روسی آئل ریفائنریوں، صنعتی تنصیبات، گوداموں اور دیگر معاشی و لاجسٹک انفرااسٹرکچر کو نشانہ بنایا ہے۔ یوکرین کا مؤقف ہے کہ ایسے اہداف روس کی جنگی سرگرمیوں اور فوجی اخراجات کے لیے اہم ہیں۔

پیوٹن نے جواباً یوکرین کے زرعی شعبے اور برآمدی انفرااسٹرکچر سمیت دیگر اہم معاشی اہداف کے خلاف کارروائی کا عندیہ دیا۔ روس اس سے قبل بحیرۂ اسود کے راستے یوکرینی اناج کی برآمدات سے متعلق تنصیبات اور انفرااسٹرکچر کو بھی نشانہ بنا چکا ہے۔

روسی صدر نے تاہم کہا کہ ماسکو امن مذاکرات کے لیے اب بھی تیار ہے، لیکن کسی بھی مذاکرات میں موجودہ زمینی حقائق کو مدنظر رکھنا ہوگا۔ ان کے مطابق یوکرین کی جانب سے پیش کی جانے والی بعض تجاویز موجودہ حالات میں قابلِ قبول نہیں ہیں۔

پیوٹن کے تازہ بیان کے بعد روس اور یوکرین کے درمیان معاشی اور بنیادی ڈھانچے کے اہداف کو نشانہ بنانے کی کارروائیوں میں مزید شدت کا خدشہ پیدا ہوگیا ہے، جس سے جنگ کے دائرہ کار میں اضافے اور دونوں ممالک کی اہم معاشی تنصیبات کے مزید نشانہ بننے کا امکان بڑھ گیا ہے۔