ایران نے منفرد فضائی دفاعی نظام تیار کر لیے، جلد پیداوار شروع کرنے کا اعلان

تہران: ایران کی بری فوج کی فضائی دفاعی فورس نے ایسے نئے مقامی ساختہ فضائی دفاعی نظام تیار کر لیے ہیں جن کا کوئی معلوم غیرملکی متبادل موجود نہیں، جبکہ تکنیکی اور قانونی مراحل مکمل ہونے کے بعد ان کی پیداوار شروع کرنے کا اعلان کیا گیا ہے۔

ایرانی خبر رساں ادارے مہر نیوز کے مطابق بری فوج کی فضائی دفاعی فورس کے کمانڈر بریگیڈیئر جنرل علیرضا الہامی نے کہا ہے کہ نئے دفاعی نظاموں کے ڈیزائن کو بتدریج عملیاتی مصنوعات میں تبدیل کیا جا رہا ہے اور ان کا کوئی تسلیم شدہ غیرملکی مساوی موجود نہیں۔

علیرضا الہامی نے کہا کہ 40 روزہ جنگ کے دوران ایرانی فضائی دفاعی فورس نے اپنے تیار کردہ بعض مقامی نظام استعمال کیے، جن کی مدد سے دشمن کے 200 سے زائد طیارے مار گرائے گئے۔

انہوں نے کہا کہ ان نظاموں کی خصوصیات، صلاحیتوں اور عملی استعمال کے طریقہ کار سے دشمن کی محدود واقفیت بھی ان کی ایک اہم طاقت ثابت ہوئی۔ بعض مواقع پر دشمن کو یہ معلوم نہیں ہوسکا کہ اس کے داغے گئے ہتھیار کو کس دفاعی نظام نے نشانہ بنایا، جبکہ اسے ان نظاموں کا توڑ کرنے کے طریقہ کار کا بھی درست علم نہیں تھا۔

ایرانی کمانڈر کے مطابق نئے فضائی دفاعی نظام میدان میں استعمال اور کارکردگی کے جائزے کے بعد تکمیل کے مزید مراحل سے گزریں گے۔ قانونی اور تکنیکی مراحل مکمل ہونے اور نظام مطلوبہ تیاری کی سطح حاصل کرنے کے بعد انہیں پیداواری اور مزید یونٹس کی تیاری کے مرحلے میں داخل کیا جائے گا۔

انہوں نے کہا کہ نئے نظاموں کو عملی میدان میں آزمانے کے بعد ان کی کارکردگی کا جائزہ لیا جائے گا اور مطلوبہ معیار پر پورا اترنے کی صورت میں بڑے پیمانے پر پیداوار شروع کی جائے گی۔