ججز کی تقرری پر حکومت اور ایوان صدر میں ڈیڈلاک برقرار

اسلام آباد: ججز کی تقرری کے معاملے پر وفاقی حکومت اور ایوان صدر کے درمیان ڈیڈلاک برقرار ہے، آج ہونے والے اہم اجلاس میں بھی کوئی حتمی فیصلہ نہ ہوسکا۔

ذرائع کے مطابق ججز کی تقرری کے معاملے پر حکومت اور ایوان صدر کے درمیان مشاورت ہوئی، تاہم معاملہ حل نہ ہوسکا۔ اجلاس آئندہ ایک، دو روز میں دوبارہ منعقد کیے جانے کا امکان ہے۔

وفاقی حکومت کے ذرائع کا کہنا ہے کہ حکومت ججز کی تقرری کے معاملے پر عدالتی فیصلے کا بھی انتظار کر رہی ہے۔

دوسری جانب ایوان صدر کے ذرائع کے مطابق ججز کی تقرری کے معاملے پر ہونے والے اجلاس اور آئندہ پیش رفت سے میڈیا کو آگاہ کیا جائے گا۔

بتایا گیا ہے کہ صدر مملکت نے وزیراعظم ہاؤس کی جانب سے ارسال کردہ ججز کی تقرری کی سمری تاحال منظور نہیں کی۔ وزیراعظم نے جوڈیشل کمیشن کی سفارشات کی روشنی میں مختلف عدالتوں میں ججز کی تعیناتی کے لیے سمری صدر مملکت کو ارسال کی تھی۔

میڈیا ذرائع کے مطابق سمری کی منظوری اور حکومت کے مؤقف کے باعث معاملہ مزید اہم ہوگیا ہے، جبکہ آئندہ ایک، دو روز میں ہونے والی مشاورت کو فیصلہ کن قرار دیا جا رہا ہے۔