فیلڈ مارشل عاصم منیر کی ترکیہ میں اعلیٰ سطحی ملاقاتیں، دفاعی تعاون کے فروغ پر تبادلہ خیال
رپورٹ: Editor
شائع: 01 Sep 2026
2 منٹ کا مطالعہ
فیلڈ مارشل عاصم منیر کی ترکیہ میں اعلیٰ سطحی ملاقاتیں، دفاعی تعاون کے فروغ پر تبادلہ خیال
راولپنڈی، 31 اگست: چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرأت نے اپنے سرکاری دورۂ ترکیہ کے دوران استنبول میں اعلیٰ سطح کی اہم ملاقاتیں کیں۔
آئی ایس پی آر کے مطابق فیلڈ مارشل سید عاصم منیر نے سعودی عرب کے وزیر دفاع شہزادہ خالد بن سلمان بن عبدالعزیز آل سعود، ترکیہ کے وزیر خارجہ حاقان فیدان، وزیر قومی دفاع یاشار گولر اور ترک جنرل اسٹاف کے سربراہ جنرل سلجوق بایراکتار اوغلو سے الگ الگ ملاقاتیں کیں۔
ملاقاتوں کے دوران باہمی دلچسپی کے امور، دوطرفہ دفاعی تعاون اور خطے کی سکیورٹی صورتحال پر تبادلہ خیال کیا گیا۔
چیف آف آرمی اسٹاف و چیف آف ڈیفنس فورسز نے مکہ معاہدے برائے مشترکہ دفاع کے تحت اسٹریٹجک سیاسی و دفاعی کمیٹی کے اجلاس میں بھی شرکت کی، جس میں پاکستان، ترکیہ اور سعودی عرب کے نمائندے شریک ہوئے۔ اجلاس میں تینوں ممالک کے درمیان اسٹریٹجک رابطہ کاری اور دفاعی تعاون کو مزید مضبوط بنانے کے امکانات کا جائزہ لیا گیا۔
آئی ایس پی آر کے مطابق فیلڈ مارشل عاصم منیر کی ملاقاتوں اور اجلاس میں شرکت نے پاکستان، سعودی عرب اور ترکیہ کے درمیان برادرانہ تعلقات اور بڑھتے ہوئے اسٹریٹجک و دفاعی تعاون کی عکاسی کی۔
