ٹرمپ نے ول شارف کو نیا وائٹ ہاؤس کونسل مقرر کردیا

واشنگٹن: امریکی صدر ڈونلڈ ٹرمپ نے وائٹ ہاؤس کے موجودہ اسٹاف سیکریٹری ول شارف کو نیا وائٹ ہاؤس کونسل مقرر کرنے کا اعلان کردیا ہے۔ شارف یکم ستمبر سے نئی ذمہ داریاں سنبھالیں گے۔

ول شارف اس وقت اسٹاف سیکریٹری کی حیثیت سے وائٹ ہاؤس کے انتظامی امور اور صدر تک اہم دستاویزات کی ترسیل کی نگرانی کر رہے ہیں۔ وہ نیشنل کیپیٹل پلاننگ کمیشن کے چیئرمین بھی ہیں۔

ٹرمپ انتظامیہ کے مطابق شارف اس سے قبل صدر ٹرمپ کی قانونی ٹیم کا حصہ رہ چکے ہیں اور صدارتی استثنیٰ سمیت مختلف اہم مقدمات میں ان کی نمائندگی کرچکے ہیں۔ انہوں نے ٹرمپ کے خلاف انتخابی مداخلت سے متعلق مقدمے میں بھی قانونی دفاع میں کردار ادا کیا تھا۔

شارف وائٹ ہاؤس کونسل کے عہدے پر ڈیوڈ وارنگٹن کی جگہ لیں گے، جو عہدہ چھوڑ کر نجی شعبے میں جانے کا ارادہ رکھتے ہیں۔ وارنگٹن ٹرمپ کے قریبی قانونی مشیروں میں شمار ہوتے ہیں اور 2024 کی صدارتی مہم کے دوران بھی ان کے ذاتی قانونی مشیر رہے تھے۔

وائٹ ہاؤس کونسل صدر کے اہم قانونی معاملات میں مشاورت فراہم کرتا ہے، جن میں صدارتی اختیارات، قانونی مقدمات، قانون سازی کا جائزہ اور صدارتی معافیوں سے متعلق امور شامل ہیں۔

ٹرمپ نے شارف کی تقرری کا خیرمقدم کرتے ہوئے انہیں باصلاحیت اور مضبوط قانونی ماہر قرار دیا ہے۔ شارف کی تقرری ایسے وقت میں ہوئی ہے جب ٹرمپ انتظامیہ کو متعدد قانونی چیلنجز کا سامنا ہے اور نومبر میں وسط مدتی انتخابات بھی ہونے والے ہیں۔