پاکستان اور ترکیہ کا اعلیٰ سطحی اسٹریٹجک تعاون کونسل کا آئندہ اجلاس جلد بلانے پر اتفاق

استنبول، 30 اگست: نائب وزیراعظم و وزیر خارجہ سینیٹر محمد اسحاق ڈار نے استنبول میں ترکیہ کے وزیر خارجہ ہاکان فیدان سے ملاقات کی، جس میں دوطرفہ تعلقات کے مزید فروغ اور علاقائی و عالمی امور پر تبادلہ خیال کیا گیا۔

وزارت خارجہ کے مطابق دونوں رہنماؤں نے سیاسی، اقتصادی، سکیورٹی اور ثقافتی شعبوں میں پاکستان اور ترکیہ کے درمیان دوطرفہ تعلقات کے مسلسل استحکام اور توسیع پر اطمینان کا اظہار کیا۔

ملاقات میں پاکستان۔ترکیہ اعلیٰ سطحی اسٹریٹجک تعاون کونسل (HLSCC) کے فریم ورک کے تحت ہونے والی پیش رفت کا خیرمقدم کرتے ہوئے دونوں وزرائے خارجہ نے کونسل کے آئندہ اجلاس کا جلد انعقاد کرنے پر اتفاق کیا۔

دونوں جانب سے علاقائی اور عالمی اہمیت کے حامل امور پر بھی تبادلہ خیال کیا گیا اور علاقائی امن و استحکام کے لیے قریبی تعاون اور رابطہ جاری رکھنے کے عزم کا اعادہ کیا گیا۔

خصوصی سیکریٹری (اقوام متحدہ) نبیل منیر، ڈائریکٹر جنرل (اقوام متحدہ) عمر صدیق، فرسٹ سیکریٹری قاضی سلیم اور وزیر خارجہ کے ڈپٹی ڈائریکٹر آغا حنین بھی نائب وزیراعظم و وزیر خارجہ اسحاق ڈار کے ہمراہ ملاقات میں شریک تھے۔