لاہور: پنجاب حکومت نے لاہور میں اولڈ پی اینڈ ڈی بلڈنگ کی جگہ تعمیر کیے گئے نئے انتظامی کمپلیکس کو ’’نیو سول سیکریٹریٹ‘‘ کا نام دے دیا ہے، جبکہ کمپلیکس کے دو ٹاورز کو ’’ٹاور ون‘‘ اور ’’ٹاور ٹو‘‘ قرار دیتے ہوئے متعلقہ محکموں کو دفاتر منتقل کرنے اور سرکاری خط و کتابت میں نئے نام اور ایڈریس استعمال کرنے کی ہدایت کردی گئی ہے۔

حکومت پنجاب کے فیصلے اور 5 اکتوبر کو جاری ۔وٹیفیکیشن کے مطابق بینک روڈ لاہور پر واقع اولڈ پی اینڈ ڈی بلڈنگ سائٹ کا نام تبدیل کرکے ’’نیو سول سیکریٹریٹ‘‘ رکھ دیا گیا ہے۔ محکمہ سروسز اینڈ جنرل ایڈمنسٹریشن ڈیپارٹمنٹ (ایس اینڈ جی اے ڈی) کے ویلفیئر ونگ کی جانب سے جاری نوٹیفکیشن میں متعلقہ محکموں کو ہدایت کی گئی ہے کہ سرکاری خط و کتابت، لیٹر ہیڈز، دفتری پتوں، ڈائریکٹریز اور دیگر سرکاری ریکارڈ میں نئے نام استعمال کیے جائیں۔

نوٹیفکیشن کے تحت سابق اولڈ پی اینڈ ڈی بلڈنگ کے ٹاور اے کو ’’ٹاور ون‘‘ جبکہ ٹاور سی کو ’’ٹاور ٹو‘‘ کا نام دیا گیا ہے۔ متعلقہ محکموں کو ہدایت کی گئی ہے کہ وہ اپنے دفتری ریکارڈ اور مراسلت میں ٹاورز کے نئے نام اور نیو سول سیکریٹریٹ کا ایڈریس درج کریں۔

اولڈ پی اینڈ ڈی بلڈنگ کی جگہ نئے انتظامی ٹاورز کی تعمیر پنجاب حکومت کے بڑے ترقیاتی منصوبوں میں شامل رہی ہے۔ انفراسٹرکچر ڈویلپمنٹ اتھارٹی پنجاب کے دستیاب ریکارڈ کے مطابق ایڈمنسٹریٹو ٹاور اے میں دو بیسمنٹ، گراؤنڈ فلور اور اس کے علاوہ دس منزلیں تعمیر کی گئی ہیں۔ منصوبے کا مقصد صوبائی محکموں کے لیے جدید اور مرکزی دفتری سہولیات فراہم کرنا ہے۔

نئے کمپلیکس میں مختلف سرکاری محکموں کے دفاتر کی منتقلی کا عمل بھی شروع ہوچکا ہے۔ ایک ٹاور فعال ہونے کے بعد متعلقہ محکموں نے وہاں کام شروع کردیا ہے، جبکہ دوسرے ٹاور کو بھی مرحلہ وار فعال کرنے اور مختلف دفاتر منتقل کرنے کا عمل جاری ہے۔

نئے انتظامی کمپلیکس کو فعال بنانے کے لیے 2026 کے دوران مختلف سرکاری خدمات کے حصول کے اقدامات بھی کیے گئے۔ ٹاورز کے لیے سیکیورٹی، صفائی اور تکنیکی عملے سمیت دیگر سہولیات سے متعلق ٹینڈرز بھی جاری کیے گئے، جس سے ظاہر ہوتا ہے کہ عمارتوں کو باقاعدہ سرکاری دفتری استعمال میں لانے کا عمل جاری ہے۔

حکومت کی جانب سے نام کی تبدیلی کے بعد اب نئے کمپلیکس میں منتقل ہونے والے محکموں کو اپنے سرکاری ایڈریس بھی اپ ڈیٹ کرنا ہوں گے۔ سرکاری مراسلت، لیٹر ہیڈ، دفتری دستاویزات اور دیگر متعلقہ ریکارڈ میں پرانے ’’اولڈ پی اینڈ ڈی بلڈنگ‘‘ کے بجائے ’’نیو سول سیکریٹریٹ‘‘ کا نام استعمال کیا جائے گا۔

واضح رہے کہ پنجاب میں لاہور کا مرکزی پنجاب سول سیکریٹریٹ اور جنوبی پنجاب سیکریٹریٹ پہلے سے کام کررہے ہیں۔ اولڈ پی اینڈ ڈی بلڈنگ سائٹ کو ’’نیو سول سیکریٹریٹ‘‘ کا نام دینے کا تازہ فیصلہ لاہور میں ایک نئے سرکاری دفتری کمپلیکس کی باضابطہ نامزدگی اور مختلف صوبائی محکموں کی وہاں منتقلی سے متعلق ہے۔ دستیاب نوٹیفکیشن کی بنیاد پر اسے جنوبی پنجاب سیکریٹریٹ کی طرز پر ایک علیحدہ انتظامی خطے کے قیام سے تعبیر نہیں کیا جاسکتا۔

پنجاب حکومت کے اس فیصلے کے بعد بینک روڈ پر واقع سابق اولڈ پی اینڈ ڈی بلڈنگ سائٹ اب ’’نیو سول سیکریٹریٹ‘‘ کے نام سے شناخت کی جائے گی، جبکہ نئے انتظامی کمپلیکس کے دونوں ٹاورز سرکاری طور پر ’’ٹاور ون‘‘ اور ’’ٹاور ٹو‘‘ کہلائیں گے۔