اسلام آباد (نمائندہ خصوصی)۔ دنیا کی معروف ٹیکنالوجی کمپنی گوگل نے اینڈرائیڈ 6.0 (Marshmallow) پر چلنے والے اسمارٹ فونز کے لیے Google Play Services کی باضابطہ سپورٹ ختم کر دی ہے۔ اس فیصلے کے بعد اینڈرائیڈ 6.0 استعمال کرنے والے لاکھوں صارفین کو وقت کے ساتھ نئی ایپس، سکیورٹی اپ ڈیٹس اور گوگل کی متعدد جدید سروسز تک رسائی میں مشکلات کا سامنا کرنا پڑ سکتا ہے۔ گوگل کی ڈویلپر دستاویزات اور بین الاقوامی ٹیک رپورٹس کے مطابق اب Google Play Services کے نئے ورژنز صرف Android 7.0 (Nougat) اور اس کے بعد کے آپریٹنگ سسٹمز پر دستیاب ہوں گے۔ اس کا مطلب یہ ہے کہ Android 6.0 پر چلنے والے فونز کو مزید نئی Play Services اپ ڈیٹس موصول نہیں ہوں گی۔ واضھ رہے کہ ٹیکنالوجی کی دنیا میں جدت لانے کے لیے ادارے مسلسل اپنی گوگل میپس کا بڑا 2026 اپ ڈیٹ: اے آئی اور تھری ڈی فیچرز متعارف جیسے اقدامات کرتے رہتے ہیں، تاکہ صارفین کو محفوظ اور تیز ترین سروسز فراہم کی جا سکیں۔

سپورٹ ختم ہونے کے اثرات

واضح رہے کہ اینڈرائیڈ 6.0 (Marshmallow) کو گوگل نے 2015 میں متعارف کرایا تھا۔ اگرچہ یہ اس وقت ایک اہم اپ ڈیٹ تھا، لیکن اب یہ جدید ایپس اور سکیورٹی تقاضوں کے لیے پرانا پلیٹ فارم بن چکا ہے، جس کے باعث گوگل نے اس کی سپورٹ ختم کرنے کا فیصلہ کیا ہے۔ ماہرین کے مطابق اس فیصلے کا مطلب یہ نہیں کہ اینڈرائیڈ 6.0 والے فون فوری طور پر کام کرنا بند کر دیں گے۔ صارفین بدستور کالز کر سکیں گے، پیغامات بھیج سکیں گے، تصاویر دیکھ سکیں گے اور پہلے سے انسٹال شدہ کئی ایپس استعمال کر سکیں گے، تاہم وقت کے ساتھ ان فونز کی فعالیت محدود ہوتی جائے گی۔ گوگل پلے سروسز اینڈرائیڈ کا ایک بنیادی جزو ہے جو پس منظر میں کام کرتے ہوئے گوگل اکاؤنٹ میں سائن اِن، پش نوٹیفکیشنز، گوگل میپس، لوکیشن سروسز، سکیورٹی ویریفکیشن، ڈیٹا سنک اور متعدد دیگر فیچرز کو فعال رکھتا ہے۔ یہی وجہ ہے کہ بیشتر جدید اینڈرائیڈ ایپس درست طریقے سے کام کرنے کے لیے Google Play Services پر انحصار کرتی ہیں۔ سکیورٹی اور ایپ اپ ڈیٹس کے چیلنجز ماہرین کا کہنا ہے کہ Play Services کی سپورٹ ختم ہونے کے بعد بہت سی نئی ایپس یا تو اینڈرائیڈ 6.0 پر انسٹال نہیں ہوں گی یا پھر ان کے نئے ورژن دستیاب نہیں ہوں گے۔ اسی طرح متعدد موجودہ ایپس کی اپ ڈیٹس بھی آہستہ آہستہ بند ہو جائیں گی کیونکہ زیادہ تر ڈویلپرز صرف جدید اینڈرائیڈ ورژنز کے لیے اپنی ایپس تیار کر رہے ہیں۔ اس فیصلے کا ایک اہم پہلو سکیورٹی بھی ہے۔ چونکہ پرانے فونز کو Google Play Services کی نئی اپ ڈیٹس اور جدید سکیورٹی فیچرز نہیں ملیں گے، اس لیے وہ مستقبل میں سائبر حملوں، میل ویئر اور دیگر سکیورٹی خطرات کے مقابلے میں زیادہ غیر محفوظ ہو سکتے ہیں۔ ٹیکنالوجی ماہرین نے ایسے صارفین کو مشورہ دیا ہے جن کے فون اینڈرائیڈ 6.0 سے آگے اپ ڈیٹ نہیں ہو سکتے کہ وہ مستقبل میں بہتر سکیورٹی، نئی ایپس اور جدید فیچرز سے فائدہ اٹھانے کے لیے نسبتاً نیا اینڈرائیڈ فون استعمال کرنے پر غور کریں۔ گوگل کے مطابق یہ اقدام اینڈرائیڈ پلیٹ فارم کو زیادہ محفوظ، تیز رفتار اور جدید رکھنے کی حکمت عملی کا حصہ ہے، کیونکہ دنیا بھر میں زیادہ تر صارفین پہلے ہی اینڈرائیڈ 7.0 یا اس سے جدید ورژنز استعمال کر رہے ہیں۔