آسان تاجر اسکیم تاجروں کو رسمی معیشت میں شامل ہونے کا موقع فراہم کرتی ہے، چیف کمشنر آر ٹی او کی اسلام آباد چیمبر میں گفتگو

اسلام آباد: چیف کمشنر ریجنل ٹیکس آفس (آر ٹی او) اسلام آباد نے کہا ہے کہ آسان تاجر اسکیم ٹیکس نظام کو آسان بنانے، رضاکارانہ ٹیکس ادائیگی کی حوصلہ افزائی اور تاجروں کو رسمی معیشت کا حصہ بنانے کی جانب اہم قدم ہے۔

اسلام آباد چیمبر آف کامرس اینڈ انڈسٹری (آئی سی سی آئی) میں منعقدہ انٹرایکٹو سیشن سے خطاب کرتے ہوئے چیف کمشنر آر ٹی او نے ریٹیلرز اور چھوٹے دکانداروں پر زور دیا کہ وہ آسان تاجر اسکیم کے تحت رجسٹریشن کرائیں اور 30 ستمبر 2026 تک اپنی ٹیکس ریٹرنز فائل کریں۔

انہوں نے کہا کہ سالانہ 20 کروڑ روپے تک ٹرن اوور رکھنے والے تاجر آسان ٹیکس نظام کا انتخاب کرسکتے ہیں، جبکہ انہیں معمول کے مطابق ٹیکس ریٹرن فائل کرنے کا اختیار بھی حاصل ہوگا۔ آسان نظام کے تحت اہل تاجروں کے لیے کم از کم سالانہ ٹیکس 25 ہزار روپے مقرر کیا گیا ہے اور مقررہ شرائط پوری کرنے والے تاجروں کو آڈٹ سے استثنیٰ حاصل ہوگا۔

چیف کمشنر آر ٹی او نے کہا کہ اسکیم چھوٹے کاروباروں کو ٹیکس ذمہ داریوں کے حوالے سے یقین اور سہولت فراہم کرتی ہے اور ایسے تاجروں کے لیے رسمی معیشت میں شامل ہونے کا آسان راستہ کھولتی ہے جو ابھی تک ٹیکس نیٹ سے باہر ہیں۔

انہوں نے بتایا کہ رجسٹریشن کا عمل آسان بنایا گیا ہے جبکہ متعلقہ فارم اردو زبان میں بھی دستیاب ہے۔ تاجر Tax Asaan App کے ذریعے رجسٹریشن کراسکتے ہیں، جبکہ ٹیکس حکام رہنمائی کے خواہشمند تاجروں کو براہ راست سہولت فراہم کریں گے۔ کاروباری برادری کی مدد کے لیے خصوصی ٹیمیں بھی تشکیل دی گئی ہیں جو دکانوں اور تاجر تنظیموں کے دفاتر میں جاکر رجسٹریشن کے عمل میں معاونت کریں گی۔

چیف کمشنر نے کہا کہ اسکیم کے تحت آڈٹ سے استثنیٰ اور ایمنسٹی سمیت متعدد سہولیات فراہم کی جارہی ہیں، اس لیے تاجر برادری کو اس موقع سے فائدہ اٹھانا چاہیے۔ رجسٹرڈ دکانوں کے باہر کیو آر کوڈ والی گرین پلیٹیں بھی آویزاں کی جائیں گی جو ٹیکس تعمیل کی علامت ہوں گی اور شفافیت کو فروغ دیں گی۔

قبل ازیں چیف کمشنر آر ٹی او اسلام آباد نے آئی سی سی آئی صدر سردار طاہر محمود، آر ٹی او کے سینئر افسران، چیمبر عہدیداران اور کاروباری نمائندوں کے ہمراہ آئی سی سی آئی میں انکم ٹیکس فسیلیٹیشن ڈیسک کا افتتاح کیا۔ انہوں نے کہا کہ یہ ڈیسک چھوٹے تاجروں کے لیے ون ونڈو سہولت کے طور پر کام کرے گا، جہاں رجسٹریشن، ریٹرن فائلنگ اور ٹیکس سے متعلق دیگر امور میں براہ راست رہنمائی اور معاونت فراہم کی جائے گی۔

آئی سی سی آئی صدر سردار طاہر محمود نے فسیلیٹیشن ڈیسک کے قیام کو سراہتے ہوئے کہا کہ یہ چھوٹے تاجروں کے مسائل کے حل اور ٹیکس رجسٹریشن و ریٹرن فائلنگ کو آسان بنانے کی جانب عملی قدم ہے۔ انہوں نے کہا کہ کاروباری برادری قومی اقتصادی ترقی میں ذمہ دار شراکت دار اور معیشت کی ریڑھ کی ہڈی ہے۔

انہوں نے کہا کہ فسیلیٹیشن ڈیسک ٹیکس حکام اور چھوٹے کاروباروں کے درمیان رابطے کا خلا کم کرنے، بروقت رہنمائی فراہم کرنے اور تاجروں کو غیر ضروری رکاوٹوں کے بغیر اپنی ٹیکس ذمہ داریاں پوری کرنے میں مدد دے گا۔

سردار طاہر محمود نے کہا کہ آئی سی سی آئی حکومت اور نجی شعبے کے درمیان پل کا کردار ادا کرتا رہے گا اور آسان تاجر اسکیم کے بارے میں آگاہی پیدا کرنے اور تاجروں کو ٹیکس تقاضے پورے کرنے میں ہر ممکن تعاون فراہم کرے گا۔

آئی سی سی آئی کے سینئر نائب صدر طاہر ایوب اور نائب صدر عرفان چودھری نے بھی اسکیم کے بارے میں آگاہی عام کرنے اور تاجر برادری کو سہولت فراہم کرنے میں چیمبر کے بھرپور تعاون کی یقین دہانی کرائی۔

اجلاس کی نظامت چیئرمین آئی سی سی آئی اسٹینڈنگ کمیٹی برائے ایف بی آر میاں محمد رمضان نے کی۔ اس موقع پر آر ٹی او کے سینئر افسران، آئی سی سی آئی کے سابق صدر محمد اعجاز عباسی، ایگزیکٹو ممبران، سابق عہدیداران اور مختلف مارکیٹوں و تاجر تنظیموں کے نمائندگان بھی موجود تھے۔