اے ڈی بی کے نائب صدر ینگ منگ یانگ کی وزیراعظم شہباز شریف سے ملاقات، ایم ایل ون پر جلد کام شروع کرنے پر زور

اسلام آباد، 4 ستمبر: وزیراعظم محمد شہباز شریف نے ایشین ڈویلپمنٹ بینک (اے ڈی بی) کے جنوبی، وسطی اور مغربی ایشیا کے نائب صدر ینگ منگ یانگ سے ملاقات کی، جس میں پاکستان اور اے ڈی بی کے درمیان دیرینہ ترقیاتی شراکت داری اور نئی کنٹری پارٹنرشپ اسٹریٹیجی 2026-2030 کے تحت تعاون کی ترجیحات کا جائزہ لیا گیا۔

وزیراعظم نے ینگ منگ یانگ کا پاکستان کے پہلے سرکاری دورے پر خیرمقدم کرتے ہوئے شہری بنیادی ڈھانچے، ٹرانسپورٹ اور عوامی خدمات کے منصوبوں میں اے ڈی بی کے تعاون کو سراہا۔

شہباز شریف نے کہا کہ پاکستان نے مالیاتی، ساختی اور انتظامی اصلاحات کے ذریعے مشکل معاشی بحالی کا مرحلہ کامیابی سے عبور کیا ہے، جس سے معیشت میں استحکام اور سرمایہ کاروں کا اعتماد بحال ہوا ہے۔ انہوں نے طویل مدتی معاشی تبدیلی کے لیے حکومتی عزم کا اعادہ کرتے ہوئے کہا کہ انتظامی رکاوٹوں کے خاتمے کے لیے خصوصی ٹاسک فورسز کے ذریعے اقدامات جاری ہیں۔

ملاقات میں کراچی سے پشاور تک مین لائن ون (ایم ایل ون) ریلوے کوریڈور کی جدید خطوط پر اپ گریڈیشن پر خصوصی توجہ دی گئی۔ وزیراعظم نے کہا کہ ایم ایل ون کی اپ گریڈیشن مال برداری کے نظام کو جدید بنانے، علاقائی تجارتی روابط مضبوط کرنے اور صنعتی سرگرمیوں کے فروغ کے لیے انتہائی اہم ہے۔

فریقین نے ایم ایل ون منصوبے پر جلد عملی کام شروع کرنے کی ضرورت پر زور دیا تاکہ ملک میں بنیادی ڈھانچے اور رابطوں کے نظام کو جدید بنانے کے عمل کو تیز کیا جا سکے۔

ملاقات میں نجی شعبے کی معاونت، توانائی و غذائی تحفظ، برآمدات کی مسابقتی صلاحیت میں اضافے، مصنوعی ذہانت اور انفارمیشن ٹیکنالوجی سمیت مختلف شعبوں میں تعاون بڑھانے کے امکانات پر بھی تبادلہ خیال کیا گیا۔

ملاقات کے اختتام پر اس عزم کا اظہار کیا گیا کہ کنٹری پارٹنرشپ اسٹریٹیجی 2026-2030 کی ترجیحات کو ٹھوس اقدامات میں تبدیل کیا جائے گا تاکہ پائیدار معاشی ترقی کو فروغ دینے اور پاکستانی عوام کے معیار زندگی میں بہتری لانے میں مدد مل سکے۔