شام کے وزیر خارجہ اسلام آباد پہنچ گئے، اسحاق ڈار نے استقبال کیا

اسلام آباد: شام کے وزیر خارجہ اسعد حسن الشیبانی پاکستان کے دورے پر اسلام آباد پہنچ گئے، جہاں نائب وزیراعظم و وزیر خارجہ سینیٹر محمد اسحاق ڈار نے وزارت خارجہ میں ان کا استقبال کیا۔

شامی وزیر خارجہ پاکستان کے دورے کے دوران نائب وزیراعظم و وزیر خارجہ اسحاق ڈار سے ملاقات کریں گے، جس میں پاکستان اور شام کے دوطرفہ تعلقات کے تمام پہلوؤں اور باہمی تعاون کو مزید مستحکم بنانے کے امکانات پر تبادلہ خیال کیا جائے گا۔

دونوں وزرائے خارجہ کے درمیان وفود کی سطح پر بھی مذاکرات ہوں گے۔ شامی وزیر خارجہ کا یہ دورہ تقریباً دو دہائیوں کے بعد پاکستان اور شام کے درمیان وزیر خارجہ کی سطح کا پہلا دورہ ہے۔