ویتنام میں 42 ہزار بانس کے ستونوں سے تعمیر کردہ منفرد عمارت، بغیر ایئر کنڈیشننگ قدرتی ٹھنڈک فراہم کرنے لگی

ہنوئی: ویتنام کے جزیرے فو کووک (Phu Quoc) میں واقع “گرینڈ ورلڈ فو کووک ویلکم سینٹر” جدید اور ماحول دوست تعمیرات کا شاندار نمونہ بن گیا ہے، جسے 42 ہزار بانس کے ستونوں سے تعمیر کیا گیا ہے اور اس میں مصنوعی ایئر کنڈیشننگ کا کوئی نظام موجود نہیں۔

ویتنام کے معروف ادارے وی ٹی این آرکیٹیکٹس (VTN Architects) کی تیار کردہ اس 15 ہزار 700 مربع فٹ (ایک ہزار 460 مربع میٹر) عمارت کے ڈیزائن میں ویتنام کی دو روایتی ثقافتی علامتوں، کنول کے پھول اور کانسی کے ڈھول، سے متاثر ہو کر منفرد طرزِ تعمیر اپنایا گیا ہے۔

عمارت میں محرابی راستے، گنبد نما ڈھانچہ اور بانس کے جالی دار فریم استعمال کیے گئے ہیں، جبکہ کھلی جالی دار دیواریں اور چھت میں بنایا گیا روشندان قدرتی روشنی اور ہوا کی مسلسل آمدورفت کو یقینی بناتے ہیں۔ اس جدید ڈیزائن کی بدولت دن کے وقت مصنوعی روشنی اور ایئر کنڈیشننگ کی ضرورت تقریباً ختم ہو جاتی ہے، جس سے توانائی کی نمایاں بچت ممکن ہوتی ہے۔

ماہرین کے مطابق عمارت میں استعمال ہونے والے ہزاروں بانس کے ستونوں کو رسیوں اور دھاتی پنز کے ذریعے جوڑا گیا ہے، جس سے نہ صرف ایک مضبوط اور پائیدار ڈھانچہ وجود میں آیا بلکہ یہ عمارت ویتنام کی ثقافتی شناخت کی بھی علامت بن گئی ہے۔

گرینڈ ورلڈ فو کووک ویلکم سینٹر کو ماحول دوست تعمیرات، پائیدار ڈیزائن اور قدرتی وسائل کے مؤثر استعمال کی ایک منفرد مثال قرار دیا جا رہا ہے، جو دنیا بھر میں گرین آرکیٹیکچر کے فروغ کی سمت ایک اہم پیش رفت سمجھی جا رہی ہے۔