اسلام آباد (نمائندہ خصوصی)۔ وفاقی وزیر برائے تخفیف غربت و سماجی تحفظ سید عمران احمد شاہ سے ورلڈ فوڈ پروگرام کی نو تعینات کنٹری ڈائریکٹر انیتا ہرش نے اسلام آباد میں ایک اہم ملاقات کی۔ بدھ کو وزارت سے جاری بیان کے مطابق وفاقی وزیر نے انیتا ہرش کو پاکستان میں ان کی نئی ذمہ داریاں سنبھالنے پر خیرمقدم کیا اور ان کے لیے نیک خواہشات کا اظہار کیا۔

حکومت اور ورلڈ فوڈ پروگرام کے درمیان تعاون کا اعادہ

وفاقی وزیر نے حکومت پاکستان اور ورلڈ فوڈ پروگرام کے مابین غذائی تحفظ، غذائیت اور سماجی تحفظ کے شعبوں میں جاری دیرینہ تعاون کو سراہا اور اس شراکت داری کو مزید مستحکم کرنے کے عزم کا اظہار کیا۔ ملاقات کے دوران وفاقی وزیر نے بینظیر نشوونما پروگرام کی تین سالہ توسیع کا خیرمقدم کرتے ہوئے کہا کہ اس پروگرام نے ماں اور بچے کی غذائیت کو بہتر بنانے اور بچوں میں نشوونما کی کمی (Stunting) کی شرح میں نمایاں کمی لانے میں کلیدی کردار ادا کیا ہے۔

تعاون کے نئے شعبوں پر تبادلہ خیال

فریقین نے وزارت تخفیف غربت و سماجی تحفظ کے ماتحت دیگر اداروں تک ورلڈ فوڈ پروگرام کے تعاون کو وسعت دینے کے امکانات پر تفصیلی تبادلہ خیال کیا۔ اس سلسلے میں غذائیت، غذائی تحفظ، سکول میلز پروگرام، شواہد پر مبنی پالیسی سازی اور دیگر سماجی تحفظ کے اقدامات میں باہمی تعاون کو بڑھانے پر اتفاق کیا گیا۔

وفاقی وزیر سید عمران احمد شاہ نے کہا کہ حکومت پاکستان کمزور اور مستحق طبقات کے لیے ایک موثر، جامع اور پائیدار سماجی تحفظ کا نظام مزید مضبوط بنانے کے لیے اپنے تمام ترقیاتی شراکت داروں کے ساتھ قریبی تعاون جاری رکھے گی۔ اس موقع پر انیتا ہرش نے حکومت پاکستان کے ساتھ غذائیت اور سماجی تحفظ کے شعبوں میں ورلڈ فوڈ پروگرام کے تعاون کو جاری رکھنے کے عزم کا اعادہ کیا۔ انہوں نے پاکستان میں کمزور طبقات کی فلاح و بہبود کے لیے حکومت کی کوششوں کو سراہا اور ان اہم شعبوں میں شراکت داری کو مزید وسعت دینے کی خواہش کا اظہار کیا۔